المنتدى العام خاصة بالنقاش الجاد العام للمواضيع الساخنة في الساحة (إختلاف الرأي لا يفسد للود قضية)

إضافة رد
 
أدوات الموضوع انواع عرض الموضوع
قديم 09-17-2010, 04:44 AM   #1
ابونفيسه

عضو ذهبي

الاخوة في الادارة والاعضاء بعد السلام عليكم ورحمة الله
اريد ان اوثق بعض اشعار الشوايقة الجميلة
ولكل من له شعر جميل مرحب بالاضافة


كمان زعلان
صديق احمد
عبدالله محمد خير
تعاتبنا !!! وما قبلان تكاتبنا
ما إنتو اللبيتو الحله يا نوره
ورحلتو بعيد بلا شوره
تراها الحله من يوم قمتو مهجوره
وما رضيانه بعدك إلا مجبوره
ومشتاقه
عارفه الدنيا لمان تقسى فراقه
حليل الحله .. وين أملاكه
(وين حوره)؟؟ وين شاديها ؟؟
يا شاديها ما تزوره
يا فتنه
يا البعد الله منك كان مخافتنا
أكان حيين .. وما متنا
وكان حن القدر والدنيا لمتنا
وتاني الحله زي ما كنا ضمتنا
بنحلف ليك بزمتنا
سعادتك كل مهمتنا
وبلاك قامت قيامتنا.






التعديل الأخير تم بواسطة المصحح ; 09-17-2010 الساعة 09:54 AM
  رد مع اقتباس
قديم 09-17-2010, 04:47 AM   #2
ابونفيسه

عضو ذهبي
افتراضي

حوا كلمات خالد شقورى
أداء يعقوب تاج السر

ضمه جسم الليل عويله وضمت الاهات زليله
حوا ياناس ياحليله وثاني ياناس ياحليله
ماسكي كف الثوب تخيط والدموع تنزل هميله
كان متاكي الباب وخايفي من ابوها يشوف حويله
مالعليهو هو ماهو هين كيف تعل روحو العليله
كان يقول لها حوا مالك والعذاب كيفن مشى لك
حوا لا تزيدي العليكي فوق كتيفي انا شايلو فالك
حوا ماهميني حالي الا بس هاميني حالك
حو ا حوا باقي نصبر ونحبس العبر الثقيله
حوا برد الدنيا اكبر والله اكبر من عغتاها
كان بامكانه تسرق بس ضمير الخير حماها
زاد ازاها وزاد شقاها لمه ابوها الراجيه ودع
وروحو دقت بوغ رحيله
حوا قالت داير تاكل لو لقت لها لقمه نيه
قالوا ليها ان دايري تاكلي اكلي في خاطرك شويه
اضحكيلم وابسميلم تلقي بدل القمه ميه
حوا قالت دايره تغمر لو حلم بالفرحه طافه
قالو ليها الدايري تغمر الا في صدر السخافه
بينا وبين عيشة المعزه ماخلاص بعدت مسافه
حتى قدر الموت اباها مش حرام الموت ياعافا
سوت الشاي للعطالي ماجنت غير الرزاله
حامت الحلات تغسل شالو ناس الحله حاله
مدت الايد للعمايه ختو في ايدينه لالا
قنبت في ضل مصغر سارحة تلتق في نعالة
في ضجيج عجلات زمانه مانست صرخة جماله
حوا ماتت لمه ماتت امها وكانت طفيله
ماتت لمه ابوها روحو دقت بوغ رحيله
وماتت الف مره لمه سلبوها الفضيله
ودمتم





  رد مع اقتباس
قديم 09-17-2010, 04:49 AM   #3
ابونفيسه

عضو ذهبي
افتراضي

الرواسى للشاعر حاتم حسن الدابى
غناء جعفر السقيد
بدر مدر يا رواسي نحن بعاد لحقنا القيفة
انت مدبج ونحن نقاسى فى برد امشير والموج والزيفة
مركبك الماليها مطارق تمشي تقيف تسرح بى كيفه
مرة مغارب ومرة مشارق وانت تخاف الريح وحفيفه
ساوها زينة وفوقها بيارق وانت مدبج توب وقطيفة
فيها المات والضاربه الفالق والسلمين فى حالة مخيفة
كل الناس ترزح في كفة وانت وناسك فوق الدفة
الدايشين والراسهم لفة والشاخصين فى المدى للضفة
صوف افضالك فوقهم جوة فوق الموية وريقهم جفة
من العطش النص اتوفى وباقى النص الفضل جيفة
....
ضاقوا المر والحال استعصى الشغال واللاحق الحصة
الواصال للرحم اتقصة والهداي مو لاقى الفرصة
الرساي سافر ما وصى خلى محمد واحمد وحفصة
الاطفال العرفو القصة سدت جوة حلوقهم غصة
من الجوع الدم اتمصة واصبح كل الحلم رغيفة
.....
كل الراكب شاف احلامه دون احساس ماتت قدامه
فنُ كتابه وكسر اقلامه لا الوالدين لا جار ما لامه
ناس الحلة القعدوا وقاموا اصر والح يمشى كلامه
هزموهو اخوانه البى الجوع نامو وكم خريج ما لاقى وظيفة
.......
يا الفكيتها وقلت لها سيرى وعارف انه الدنيا دميرى
لا فى ضفاف لا شفنا جزيرى لا فى الحيرى ولا في الطيرى
كسرت جناحها وقلت لها طيرى اتملكت الكانت ميرى
يا السودت الناصع وجيرى ايد الحق صابونى وليفة
......
قبلك كم متعلم وقاري عكس الريح فكولو الصارى
مشدوهين متعشى وحارى ريسها شلته والبحارى
كم سنوات علام البارى واقفى وهم شايفنها جارى
بقينا هلاك والقيف متضارى لا حجار لا دوحة وريفة
.....
حسك عينك ما تتمادى وتنسى الراكب عنده ارادة
الاهوال الشافها وخاضها كان فى مدرسة والا عيادة
شفنا الايد الكان اجوادة يا مبتورة يا شحادة
وياما رقاب كانت سدادة علمت الله من التعريفة
......
يا ريسنا قدر مديرك فك الدفة وادها غيرك
احفظ نفسك ترضى ضميرك وقف اوع تواصل سيرك
كان طاوعتنى شن بيضيرك عرض اكتافك وفك البيرك
لا هنى شكرا وكتر خيرك وكل انسان في الارض خليفة
__________________





  رد مع اقتباس
قديم 09-17-2010, 04:51 AM   #4
ابونفيسه

عضو ذهبي
افتراضي


يا محسنين لله
حاتم حسن الدابي

قومة من النباه ما ضاقلو قوت الفاه
غير كلمتين فى اليوم إعتادن الحلقوم
من الصباح للنوم يا مـحسنين لله
تبدأ الصباح بالآه ومنك زمن تواه
وتتمسى يا الله من شدة المأساه
ترقد رفقت الشاه حالاً صعب رضاه

جواها صوت مخنوق ما بيسمعوا المخلوق
وبالاً شتيت ممحوق وأنه أسى وخازوق
بحت لسان مريوق ينادى مـعـتـصـمـاه
يا محسنين لله
حبل المروه الكان ممدود من الجيران
وأعـمـــامـه والخلان بالمطرقة وسندان
يا حليل رجلنا زمان بس فضلو الأشباه

قبال ثلاثة سنين يتمت من الوالدين
ومن بعـــــدو بسنتين راح الكفيل وحنين
خلا لها دمعة عين وخلا لها خمسة أفواه


صبارة قادرة تطيق كل الآلم والضيق
وتغلب نشاف الريق والمصلا والابريق
وقلبـــاً وفى وصـــــديق لا ضل يوم لا تاه

إلا الصغيرونين يتبـــــاكو هم دايرين
فى لحظة وحين مـا بيعوفـوا المن وين
والحــوجة سيفه سنين يقتل رقاب الجاه

سالت دموع أنهار جسر الصمود إنهار
عارفى العدم جبار مر ما بيراعى صغار
إلا الفقر مـو عار بس للوجوه شواه

ضايقى العذاب كم نوع وعارفى السؤال ممنوع
شبعانه فوقو الصوع ورويانه نوح ودموع
الله يجازى الجوع كم كم حنالو جباه

تب يا زمن مـحاق من ضلك الرقـــــاق
يا قاسى يا فراق يا اللى الفرح سراق
حنضل أساق دقاق مـا بيحملنو شفاه

عطش السنين فى الجوف طرد السئم والخوف
فرش دواخلى حـروف روينا بالمعــــــــروف
ولا قلة المصـــــــروف لا الحـــــوجــة تتوطاه





  رد مع اقتباس
قديم 09-17-2010, 04:57 AM   #5
ابونفيسه

عضو ذهبي
افتراضي


بحر المودّة "يا يُمّــه"

شوفي الزمن يا يمه ساقني بعيد خلاص
دردرني وإتغرّبت وإتبهدلت ورّينيالخلاص
ساقني القدر منّك بعيد لأذاي كاس جرعنيكاس . .
يا يمه يا فيض الحنان الما كمل
يا يمه يا بدري البشع دايما يهلً
يا يمه يا نور الصباح وكتين يطل
وا شري يا زينوبة
ولدك في بحور الشوق كتل
محروم من الحب والمحنة وراك همل

يا يمه يا بحر المودة وكتينيفيض
يا يمه يا شعلة أمل زادت وميض
يا يمه يا عنقود كلام منظوم قريض
يا يمه يا نغماً حنين بالشوق يرن
وافكاري فيهو بيرتعن
دمعاتي شانو بينزلن
بتذكّرك يا يمه
في الدغش النسايمو يهبهبن
قايمي الصباحمتكفلتي وشايلي الحليلي على المراح
والساعة ديك يا دوبو ديكنا بدا الصياح
والطير صغارو يغرّدن . .
جبتي اللبن بي إنشراح

واتذكرك يايمةفي ساعة الهجير
صالاكي نار الدوكي عستيلنا الفطير
رشيتي قلتي اكلوهو خير
وإتذكّرك يا بسمة الطفل الغرير
وكت الخلوق ترقد تنوم
وارقد براي ارعى النجوم
والشوق يرف جنحيهو
بي فوق لي يحوم
واهتف باسمك في الخيال
طيفك كمانبي فوقي جال
واتمنى لو لحظات يدوم
لكني فجأة ألقاهو زال

واتذكرك يايمه ساعة الناس يجونا من البلد
ناعم ترابا علي جسيماتن رقد
ريحة التمر فوق الهدوم لون الخدار خانسلبد
والشوق أوارو بيشتعل . .
كان ظني فيهو يكون خمد

وإتذكّرك يا يمه والناس قالوا قايمينالبلد
رصوا الهديمات عدلوا
ركبوا اللواري وقبّلوا
خلّوني وحدي بلا أنيس
كيف إنفرادي اتحملوا؟
شالوا السلام من عندي ليك
وإن شاء عندك يوصلوا

يايمة ساعة يوصلوا ويقولوا ليك ..
شفناهوا في بلدالأمان
مبسوط ورايق في أمان
أنبسطييا نبع الحنان
وأنا حالي يشهدبو الزمان
يا يمّه . .
رسّلي لي عفوك ينجيني
من جــــور الزمان





  رد مع اقتباس
قديم 09-17-2010, 05:00 AM   #6
ابونفيسه

عضو ذهبي
افتراضي


عبدالرحيم البركل
نور العيون ...

اخترتا من دون العيون
يا غالية عينيك اعشقا
واخترت شوفتك كل يوم
لو حتي شوفتك اسرقا
لكني ما لاقي الفرح
لافي البعاد لافي اللقاء
وما مني هواك انا اصلي عاد
خلقوني من طين الشقا
***
مديت كتير حبل الصبر
لامن فقدت انا اولو
ومن غير صبر بقدر هواي
يا غالية شانك بحملو
بس لو سمحتي ومرة بس
عاوز قليبك اسألو
حافظ معتو زي زمان
والله الحصل كان بدلو
***
والله يا نور العيون
اصعب سفر سفر الامل
ما تلقاك تعاين في الهدف
وما داري انت متين تصل
كل الدروب جربتها
سافرت فيها عشان اصل
في كل مرة الف واعود
من تاني لي نفس المحل
***
ايوة انتي
سيبي العواطف ديك بعيد
وانسي ريدك وقولي لي
ايه الفرق لو زول زرع
االو في اخصب ودي
والتاني روح للبعيد
واخترارلو يا محبوبة صي
راح يحصد الاول اكيد
والتاني زي حالتي العلي
***
لو جيتي تسألي عن هواي
بالله اسألي عن هواك
تلقي الجواب نفس الجواب
ما قلبي يا دنياي معاك
ارجوك اوعي تفكري
قلبي يصبح لي سواك
لكنو لو فقد العشم
يمكن اقولو خلاص كفاك





  رد مع اقتباس
قديم 09-17-2010, 05:03 AM   #7
ابونفيسه

عضو ذهبي
افتراضي

كلمات
حاتم الدابي رثاء للطفلة مرام
غناء الفنان جعفر السقيد
مـرام ما جات
مرام مرقت علي الجيران ومرن ديل كم ساعات
غابت نجمة الضــيفان واكتست الأرض ظلمــات
حكايتـا كان ويامــاكان
حــكايه تشيب الولــدان
حيرت الأنــــس والــجان
وبرهنت انــو مافي امان
رجع وأد الطفــوله زمان
زمــن عبــدت هبل ومناة
*****
بعد لبست جديد فـي جديد
مـرام مرقت تبارك العيد
وقفت سمعتــنا نشيــــد
حلاة موبايلا الفـي الليد
مع التسريحــه والباندات
*****
اتاريهو القــدر منصـوب
مسطر ومـافي منــو هروب
برغم رضانــــا بالمكتوب
ده غـدرا ماوراهو سكات
*****
بدون إنذار بـدون اسباب
مرام غدروها جمب الباب
مرام هجمت عليهــا ذئاب
طباعم من شريعة الغــاب
ملاكا حـــولوهو رفــات
*****
قلوب لا رحـــمه لا إحسان
مدبجه بي صفات شيـــطان
وظهرت قـــــدرة الرحمن
محل اسنانه هو الإثبات
*****
دريبه عــلي الأرض منقوش
سريره مــن العصر مفروش
معالمه باقيه وسط الحوش
ملابس الروضـه واللعبات
*****
بعد شمس العصاري تــغيب
مرام كانت تودي تجيـــب
عنــدها بسكــويت وحليب
في تــــلاجتن راقــدات
******
وحيدة اخوانا والوالـدين
عليها يخافــوا مـتمنين
تتعلــــم تتم الـــدين
وليها يوزعوا الشربات
******
ياصاحباته وينه مـــرام
سماح يادوبو فرهــد قام
عمير ماتم خمس اعــــوام
ملازماها البراءه سمــات
*****
عيال الروضـــه ياسمحين
لمن جيتو متـــــماسكين
ماشفتـــوها راحـت ويـن
مرام سرقت منــام العين
مرام حرقت حشا الأمــات
*****
وليه بنقول مرام ماجات
مرام كلما وجيها يلوح تبق جـوانا إحساســـات
مرام بقت القلب والروح سحابه تخدر الـبلدات
مرام غصــــة حلق مجروح تقوقيها القـميريات
مرام صفحة كتاب مفتوح يقروا الطلبه والطالبات
مرام عصفور يئن مزبوح ما شفعلها الدمــــعات
مرام جزء من محمد ونوح تبارك وعم والنازعات
مرام شربة محايه ولوح وفي ساعة المغيب بخرات
مرام دعاء للجميع مسموح بعد ماتكمل الصلوات
مرام حتظل سؤال مطروح جــوه بيوتنا والطرقات
مرام حتظل سؤال مطروح وسط اولادنا في الجامعات
مرام حتظل سؤال مطروح موجه للشباب بالـــذات
ليه بدت السماحه تروح إرث اجدادنا والعادات
*****
أخيرا داير اجيــــــز القول منــو المسؤول
ماالكاتل قصاد مكتـــــول دي مــــاها حلول
إذا الوالد صبــــح مشغول منـــــو المسؤول
ومابنقدر نلــــوم زول بس بنقول منو المسؤول
نقول دي ثقافة البترول وسيف العولمه المسلول
الديجتال مع المحمــــول افلام فاضحه والمسكول
عموما بيوتنا في فك غول مخيـــــف اسمو الفضائيات





  رد مع اقتباس
قديم 09-17-2010, 05:04 AM   #8
ابونفيسه

عضو ذهبي
افتراضي

نسمه شوق

يا نسمه كيف أحوال اهلنا وحينا ...؟
احـــكـــيـــلــــى ...

عـاد مـا باقـى طـولـوا منـنـا

زى ما زمـان طارنهـن طارننـا

زى ما بنشيلن فى القلـوب شايلننـا

حتى البعـاد فتـق جروحـن زينـا

يا نسمة مـا تدسـى المكتـم عننـا

تـمـراتـنــا كــيـــف ..؟

يا نسمه عرجونا انتنى شيـلاً تقيـل

فوقـوا الدبـاس رسـل غـنـا ..

لملـم عويشـوا مــع الصـبـاح

للعـش بـنـى حـضـن الجـنـا

الـســاقــى كـــيـــف..؟

جـدولــنــا كـــيـــف..؟

الـبــوغــه كـــيـــف..؟

يــــــا نــســمـــه ..

ما شفتى المتر سايقنـو صيـف ..؟

عرباً بعااد .. يا نسمـه كيـف ..؟

مـــا قــالــوا لــيــك ..

بيوضـه .. رشـاهـا الخـريـف؟

يـا نسمـه قولـى بـدون بكـا ..

الـمـنـقــه كـــيـــف..؟

يا نسمـه صـح شـال وانتكـى ؟

يــــــا نــســمـــه ..

مالك ساكتى ؟ما قلبـى اشتكـى ..

يـــا نـسـمـة قــولــى ..

فـــتـــرت انــــــا ..

احـــكـــيـــلــــى ...

عـــن نــــاس حـيـنــا

شـيــلــى الـــســـلام ..

يـا نسـمـة بالـكـوم منـنـا ..

وديـــهـــو لــيــهــن..

فــى الشـمـال مــن عنـدنـا

وان شـــاء الله تـوصـلـى ..

بالسـلامـه.. بـــدون عـنــا





  رد مع اقتباس
قديم 09-17-2010, 05:11 AM   #9
ابونفيسه

عضو ذهبي
افتراضي

رسالة
الشاعر : خالد شقوري

وقفت بعد حلبت لبينة الشاي تكورك يا الحسن
يا ام الحسن وينو الحسن
ولمن صفت رغوة شخيبات اللبن في حلتا المبنية من طبق السكن
واقفه في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجه خير
قالتلو خير تعال لي جاي دايراك تعنون لي جواب يا الراسي لي ولدي الخدير
لا تبقي زي شافع السرير يقول لي زين آيمة زين وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت
لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
دا العشى غنمو من الدرب وسرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضل لي بس منو اليقين
وانت طول(ت) في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات يا جناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين انا كت برسلا ليك
في لوري الخزين





  رد مع اقتباس
قديم 09-17-2010, 05:12 AM   #10
ابونفيسه

عضو ذهبي
افتراضي

بلادي أنـــــــــــا

للشاعر: إسماعيل حسن

بلدي بلد ناسا مواريثم

في أول شي ..كتاب الله

وحصان مسروج، وسيف مسنون حداه درع

كتاتيبم تسرج الليل مع الحيران

وشيخا في الخلاوي ورع

وكم نخلات تهبهب في جروفا الساق

وبقرة حلوبة تتضرّع وليها ضرع

بلدي أنا

تشيل الناس ، كل الناس وساع بي حيلا وليلا يسع

وتتدفق مياه النيل على الوديان

بياض الفضة في وهج الهجير بيشع

بلدي سهول ، بلدي حقول بلدي الجنة للعاشوها

ولي البرّة بيها سمع

بلدي بلد ناساً تكرم الضيف

وحتى الطير يجيها جعان ومن أطراف تكيها شبع

بلدي بلد الصفقة والطنبور وجاراتن تنق بالليل

وبنوتن تحاكي الخيل

يشابن زي جدي الريل

بلدي أمان ، بلدي حنان وناسا حُنان

يكفكفوا دمعة المفجوع

ويبدّوا الغير على زاتم

يقسموا اللقمة بيناتم

ويدّوا الزاد حتن كان مصيرم جوع

يحبّوا الجار

يموتوا عشان حقوق الجار

يضوقوا النار عشان فد دمعة

وكيف الحال لو شافوها سايلة دموع!

ديل أهلي .. واللــــــــــه ديل أهلي

البقيف في الدار في نص الدار

وأقول لي الدنيا. كل الدنيا ديل أهلي

عرب ممزوجة بي دم الزنوج الحارّة

ديل أهلي .. ديل قبيلتي لمّن أدور أفصل للبدور فصلي

ديل فصلي

أقول بعضي

ألاقيهم تسرّبوا في مسارب الروح

بقوا كولي

ألاقي قلبي والإحساس

وسافر في بحار شوقم زمــــان عقلي

أنا محل قبّلت ألقاهم معاي ، معاي زي ضليّ

أنا لو ما جيت من زي ديل كان وا أسافاي ، وا مأساتي وا زّلي

تصوّر كيف يكون الحال لو ما كنت سودان...

وأهل الحارّة ما أهلي تصوّر





  رد مع اقتباس
قديم 09-17-2010, 05:14 AM   #11
ابونفيسه

عضو ذهبي
افتراضي

لسان الحال

الشاعر : حاتم حسن الدابي

معذرة.. لو معاك منى الكلام حــره
معليش الخطاب كاتباهـــو مضطرة
حـــرام والله مننـــا إنت تتبرا
خمسة سنين تفوت تجى فيها فد مرة
وراك أنا كم شقيت وعشت فى مرة
وتعبـت مع البطان الهم للعيون غرة
بيخاف الغرق الغاص ورا درة
قالو أدب الصغار والعقـدة من خدرة
حليلى أنا الزمن ضى فاطرى ما انفر
وخمسة سنين غياب مابتحملن حرة
أنا الحاضنة العذاب وآمالى محتضرة
وإنت الفى النعيم ما خات حساب بكرة
مسكينة التقول فى الإغتراب سترة
وتتناسى القروش فى يوم تكون ضرة
حليل زمنك وكت عايشنا بالأُجــرة
يا ريــت لا عرفـــت ولا مرق برة

الكاتما فى جواى كتير متملك الجوف والعصـب
وما كت دايرة أقولو ليـك لكن لسان الحال غلـب

ما بنسى يـوم ودعتـنا وسافـرت فى غـرة رجـب
خلـيت وراك الـدار حـزين يتباكـا والدمع انسكـب

أعذرنى والله العظيـم لو ما الضـرورة أنا ما كـتب
وأنا خايفـة فى بعـدك يكون الضاع
هو ضعف المكتسـب

اليومـة داك ناس البلـد هنونى شايقيـى وعرب
قالو لى مبروك خير وجاك يكتب سلامـتو الإغــترب

قالو لى دوب نجم السعد
طلاكى من بعــد إحتجــب
يا دوبا بالك يستريح
وتنسى العــذابات والتعــب

فضّلت أحسب فى الشهور
قاعدالى فوق نيران لهــب
صابرة وحريصة على العيال
لا بيقو للريح فى المهـب

سديت خانتك مــن مشيت قايمـابو واجبـى كأم وأب
والأسـرة يضنيها المسير
وتتهاوى لو ما فيها رب

والله ما بنـكر جميلك برضـو لينا ثناك وجب
موكب هداياك ما انقطع
كان سترة فى الزمـن الصعب

لابسين وماكلين والنعيم كايلنا
فى يوم ما نضب وعايشين معيشـة المترفين
طولنا والطبع إتخرب

البيت مفرش بالحرير ومليانة إيدى بالدهب
لكن خسارة على محل
عاش سيدو خمسة سنين عزب

الشى المهم ما قلتو ليك
وليهو إنت ما ظنيت
حسب كبرو الصغيرونين خلاص
خايفالم الطبـع الكعب

وصولوها مرحلة الخطر
والأمن ما زال مستتب
وانا كتّ قادراهم زمان
لكـن بعد كبـرو اتغلب

حصلنى قبل الجد يفوت
دوبنهم فوق العتب
قبال نحصـد الخير ندم
ومابيجدى كان لمت وعتب

خايفالم الطيش فى الدروس
ومابرضى لو واحد رسب
خوفنى المتعبنى الكبيــر
بعدين يمرقو بلا أدب

وريتك الحاصل على
لا فيهو ثورة ولا غضب
شان الحديث مايبقى نى
والواحـة يكتنفا الجدب

أنا قلبى مازال لسة حى
ونجمو الملاهج ماغرب
وآخر كلامى ترد على
لا أبقة بكــرة أنا السبب
ما كنت دايــرة اقولو ليك
لكن لسان الحال غلب





  رد مع اقتباس
قديم 09-17-2010, 05:19 AM   #12
ابونفيسه

عضو ذهبي
افتراضي


مشاويرك عديلة


عديلـه عليـك مشـاويـرك عديـلـه
عديله إن كان قصيره إن كـان طوليـه


عديله عليك محـل مـا تمشـي تمشـي
يـا عديلـه أبقيلـو زي الغيمـه رشـي
أما أنـا الهامانـي راحتـك أول الشـي
ليـك تأمرنـي وعلـي أمـرك بمشـي


بس توعدنـي مـا طـول بيـك غيبـه
وعد من أنبـل حبيـب لأجمـل حبيبـه
فيـك شفـت الدنيـا قاصيهـا وقريبـه
ومنـك اتعلمـت كيـف أقـدر أجيـبـه


لا متين يا نومي فيـك رؤيـاي تصـدق
ولا متين يا شوق موالي قليبـي تحـرق
تاني جود باللقيـا يـا زمنـي المفـرق
وتاني يا اجمل صباح في عمري أشـرق


يا حلاة العُشرة وكتين تبقي صـح صـح
ويا حلاة الريده وكتيـن تصفـى تفـرح
يا حلاة ليلاً معـاك مـا درنـا يصبـح
ويا حلاة صبحاً معاك تكون إنت المصبح


في الربيع قالوا الزهـور تنضـر تفتـح
يا ربيع في حضنو كـم لفانـي وارتـح
صار يباب بستاني من غيـرك مكـردح
غير سموم في أم شير وغير أم شير تكتح





  رد مع اقتباس
قديم 09-17-2010, 05:23 AM   #13
ابونفيسه

عضو ذهبي
افتراضي


امونة بت الشيخ حمد
ابوها كان مزواج خلاص
ناسب جميع أهل البلد
ميلادها كان عرسا كبير
هيبة ورقيص ماليها حد
يوم السماية اتيتمت
وحس القدر في الام نفد
جرت السنين واتفاوتت
بيناتنا ما ليهن عدد
امونة كبرت واستوت
فار الصدير شال النهد
وبقت أمل كل الشباب
وجمالها في بت ما اتوجد
في مرة رفا قليبها يوم
حبت قريب الشيخ حمد
وأظن كمان حباها هو
جوه الضلوع للخيط سرد
كم من غرام في القلوب
ولع لهيبو ما برد
خايفين عيون الناس تشوف
والخبر يملا البلد
والحب هناك عيباً كبير
لا بت تبوحبو ولا ولد
سنتين تلاتة مضت خلاص
والبت حياتها بقت نكد
برضو الولد زي حالتو ديك
وقليبو داك مكتول كمد
في يوم ابوها ضحك كتير
برم شواربو بلا الاسد
ناداها امنى تعالي جاي
فوق البرش ربع قعد
قالتلو هوى جاياكخلاص
وقليبها فر وما رقد
هابت عيونو قبل يقول
شافت وجيهو عليهو جد
حاج الخضر عارفاه داك
قالتلو أيوه ابو سند
جانى الصباح طالب يديك
داير نسب شيخ البلد
وانا قتلو مرحب بيك تعال
يومين تلاتة تكون عقد
راجلاً عظيم عنده القروش
عنده الحديد راقد لبد
كمان كريم واخو رجال
ماعونو فد يوم ما برد
جرت الدموع من عينا شو
وأبت تديه رد
وكتين غلب يا ناس خلاص
ولع فؤاده جمر وقد
فكر سكوت البت رضا
جاب زولو لما الناس عقد
والمال ده خمخم والحرير
تحت الرجول مدوه مد
دق الدليب صحا العيون
ما خلا فد مخلوق غمد
يوم الصفاح والناس تجوط
بالفرحة مقلوبة البلد
أمونة تبكي بكي السواد
بدل الفرح جاها النكد
وبشيشها قامت للمروق
في الزفه ما حسابها حد
كان الحبيب راقد هناك
وحيد هناك
والصدمة قاده قليبو قد
حاضن ربايتو وحيد ينوح
كم جرا للمسدار جبد
وقفت قصاده بكت كتير
لامن دميع العين جمد
قالتلو ما بيدى شىء
ديل ناس ابوى وأبو سند
أتلمو سوهو الكلام
وانالا رضيت لا جبت رد
قال عنده مالاً مو قليل
وأبوى شاف المال سجد
وأداني للراجل العجوز
المن عروقو الدم شرد
قايلنى بسعد بالقروش
والله المراح الفات ورد
لاكن محال اسعد بلاك
كان السماء ينهد هد
بديك قلبي وروحي ليك
وبعيش هناك صورة وجسد
اتراجعت دارت تعود
لكن قليبها رجع رفض
مسكت دريباً مو غريب
كم بيه صف بنوت ورد
قاصدة البحر دايرة تموت
لا عيشه لا هم لا نكد
شافت مسار النيل حزين
حتى النخيل حزنان خمد
وبشيشها فككت الحرير
لازينة لا ربيط عقد
ما دام حياتها بقت دموع
وقليبها من زولا انفرد
قالت اخير ارتاح خلاص
أرسى وشقاي القالو حد
وفي لحظة موج النيل علا
وفي جوفوغابت للأبد





  رد مع اقتباس
قديم 09-17-2010, 05:26 AM   #14
ابونفيسه

عضو ذهبي
افتراضي

ابراهيم ابنعوف

حكاية شافعة



كيـفـن أصـبــر قلـيـبـى.. وكـيـفـن أعـمــل حـسـابـى
مـا دام عشمـى فـى نظـرة .. والعنـدو النظـرة مابـى


بجرو غنايا أحكى ليكم .. تعالو أسمعوا يـا صحابـى
حكايـة الشافعـى البريـدا .. وريــدا شقـايـا وعـذابـى
أحـن لهـا حـن القـمـارى .. تقوقيـبـا أوتــار ربـابـى
واهوى الهوى فى هواها .. وهواها قرايتـى وكتابـى



منـو الـقـال ليـكـم عقـلـتَّ .. وحاتـكـم جنـيـت دابــى
بقيـت لمـان ليهـا أفـارق .. أفـارق عقلـى وصـوابـى
أضيق لمتين ليها أرجع .. أخاف مايطول بى غيابى
أعاين زين فيها وأشبع وأزيد إعجاب على إعجابـى



أشـرِّق ويـن مـا أغـرِّب .. وأشيـل هـمـى وإكتئـابـى
محل ما أمشى ألاقى طيفاً.. مشتت فكـرى وحجابـى
تطير روحى بعيد تغـازل.. خـدودك زهـر الروابـى
تتعلـق بيـن عيـونـا .. ورمـوشـا الـبـى فـوقـا كـابـى


قليبـى يفـارق ضلوعـى .. يـلاهـى عليـهـا ويشـابـى
بعـيـد مابيـقـدر يـقـاوم.. بـريـق البـسـمـة السـحـابـى
صديـرن لمـا يتفـرَّ .. تبـق نــار الله فــى أعصـابـى
وقديلتن كيتن علـى .. وا نشـاف ريقـى وخـم ترابـى


حنينـى ومـرات بتقسـى .. تقـول فـى نفسهـا اتغـابـى
إتغابى العرفـة فيهـو .. وا زرف دمعـى وواخرابـى
صحيح أصبحت مملوكا .. أسـوِّى أورادى وأزنابـى
متـل مـا ملكـت فـؤادى .. أنـا ملـك شيطـان الكتابـى


أخاف مـا بقـدر أعاتـب .. أقـو لتزعـل مـن عتابـى
أموت أحسن من هى تزعل .. أو تزرف دمعة كابى
عشانا أنـاكـم ضُقْـتَّ مُـرَّة .. عشانـا مهمِّـل عقابـى
عرفت الله فى عذابك .. إنـتّى َخـافى الله فـى شبابـى





  رد مع اقتباس
قديم 09-17-2010, 05:30 AM   #15
ابونفيسه

عضو ذهبي
افتراضي

الزمان بعذابي حكم
النعام ادم

الزمان بي عذابي حكم
تراني بقوقي بغني واترنم
اجرو مع الخيال النم
على الامي زدت الم
مضروب من عيونو سهم
دقيت بابو قالي نعم
غلبني معاهو اتكلم
قال بي مطلبك بهتم
قلتلوا ياخي جود وارحم
لو في بيتو يتبسم
عبيرو يفوح بعيد ينشم
طريحة وبيها يتبلم
اظنو على هلاكي عزم
قاسي قليبو ما بيرحم
حديد ما من لحم او دم
مر علي ما سلم
منو وليهو بتظلم






  رد مع اقتباس
قديم 09-17-2010, 05:31 AM   #16
ابونفيسه

عضو ذهبي
افتراضي

انا وآآآ
مغستي رحل تلوت الليل شقاوتي رحل تلوت الليل
مسالكي ضلمه ما بتنشق سكت روح نويرة الفرقـة
جـــوة الجـــوف تســـوي الـــبق
مشيت لا زاد أشيلو معاي ولا زولاً مـــــعا اترفــــق
ولما خلاص بقيت مارق نجيم الليل مــشي إتفــــرق
بكيت وبكيت طريف العين متمسح بالدموع رقـــرق
عشان مظلوم زماني الليلي شتت للشمـــــل فــــــرق
بسوي الووب نحاس احزاني جــــوه قليبي ينقـر دق
يوهدبي يلوعني واخــــاف من المـــــصير واشفـــق
اوادع الناس وافوت مجبور يجيني نغيم من الطنبور
اشوفلي جني وقف صفق ينط لا فوق
يـــــــــطير ينــدق واطـــير وانـــدق
وادنقر فوق تراب بلدي أخم بي إيدي فـــــي رحـلي
اقول يا ليل وافارق الدار اجر فوق الوداع مستــدار
أنــــوني أنــــوني شـــاق الـــواح محــال ارتــــاح
ادخل إيدي في رحلي تراباً فيهو تســــوى الكــــون
تــــراب بلـــــدي
اشـيل مــــنو اشـــم وارتـــــاح اشـــم طـــــيبة اهــــلي
مـــــــــــــنو تفوح ترد الروح عويناتن تلـوح وتلـــوح
عــــــراريقن طـــواقيهـن طــــــــواريهـــن سواقيهـــن
انين الســــاقي لــــما تنوح حــــسيس البربخ المفتـوح
واعاين يا تراب بلدي اشوف فيك صورة ماب تنشاف
واشم ريحة الكُليت والشاف بنات بلدي بنات بلـــــدي
طريحاتن مناديلن رقيصاتن شبابيلن
حـــليلي حـــليلي يــحليلن
واشيل من زادي واتكرف
واشوف فيك يا تراب بلدي الحنين المـــابي يتوصف
سماح ناساً حلاة ناساً بلا السكر
طعم قراصه في قدحاً من الدبكر
كواريك شفع المغرب يقلبوا في الجمــــر قنــــقر
ولاد بلدي نقاقيرن طنابيرن جـــبابيدن سنــانيرن
وافوت يا ناسي في دربي أقول يا أهلى واغلبـــي
خلاص ريدكن ملك قلبي منو الغيركن بشيل حبي
تراب بلدي بنات بلدي ولاد بلدي





  رد مع اقتباس
قديم 09-17-2010, 05:36 AM   #17
ابونفيسه

عضو ذهبي
افتراضي

قصيدة للشاعر الكبير حميد

نـــورة

وكتين يضيع

عرق الجباه الشُّم

شمار فى مرقة ..

آه .. يا نورة آه

من دربك التوّر

نفس خيل الصبر

فتـّر خطاوى الشوق

وراه .. يانورة .. آه

ساعة الشموس الغُر تهضلم

تلحق الصِّح .. فى المغارب

يدفر الضو الكهارب

تستر المدن السرابية ..

الضبابية .. الكآبة

حائط التيه .. والطشاشات ..

فوق قفيِّك يا أمْ عوارض...

يا أمْ عوارض .. مو دُعاشة

ماها شبـُّورة وتقيف ..

جايى ليك يا نورة غيمة

تملا ماعونِك خريف

يملا عينيكى ويفضـِّل

يروى جوّاك العطاشة

جاة ليك يا نورة غيمة

تملا ماعونك خريف .





  رد مع اقتباس
قديم 09-17-2010, 05:37 AM   #18
ابونفيسه

عضو ذهبي
افتراضي

السر عثمان الطيب
غناء الفنان/ محمد جبارة
بت البلد

الليله في يوماً صباحو صباح هنا
واحة عبير نغمة غنا
ريحة لبينه مقننه
مر الجنى وسلم على بت البلد
ذي عادتو سلم وأبتعد
تابعاه عين بت البلد
بت البلد سمعت ضريبات القلب
ياالله مالو ده ها القلب
بعد الثبات كيفن خرب
بت البلد عرفت تحب
***
واليوم داك وماجاها نوم
مادام خيال ود البلد يمشي يحوم
بين الخيال شافت وجيهو الهاش وباش
شافت عيونو الفيها فيض أحلامها عاش
شافت سحاب الريدة فوق واديها راش

أتذكرت قول حاج مُحُمد والدها
حالف بي يمين ود البلد ما يخدها
لو كان ركع قدامها صلى يعبدها
***
أتذكرت قول حاج مُحُمد والدها
وصف العريس الجاي بقطر الأحد
كتَّر محاسنو عددها ....
راجل موظف عندو مال
يأويك في بيتاً حلال
تبقي لو أماً للعيال
أتذكرت لمن أبت قول حاج مُحُمد والدها
كيف نهرها وكيف نهزرها
حالف بي يمين بيودرها
لو ما رضت بالجاي بي قطر الأحد
***
قاليها: ما عندك أدب
تعبان سنين فوقك تعب
بديك لي زولاً كعب
تربال عشتو عدم عدم
لو قاري لو ماسك قلم
لو أخديتو تندمي صح ندم
يشقيك يورك الألم

أتذكرت كيف الحبيب ود البلد
في الغربة سافر وأبتعد
بكت لمن الخبر زاع في البلد
أنو العريس قام بالأحد
***
الحلة جاطت والحريم يتهامسن جاي الولد
لكنهن ما عرفن الشوق كيف وقد
ما عرفن هي شوقها تب ما عندو حد
مو للعريس للحبيب ود البلد
دا الراح في زحمة ضياع ما توجد
يا حليلك إنت يا بت البلد






  رد مع اقتباس
قديم 09-17-2010, 05:40 AM   #19
ابونفيسه

عضو ذهبي
افتراضي


السر عثمان الطيب

مَغَستي..
رحل تِلُوت الليل...
شقاوتي...
رحل تلوت الليل...
مسالكي ضُلُمة ماب تنشَق..
سكت روَّح..
نويرةَ الفُرقة..
جوة الجوف تسوي البق.
مشيت..
لا زاد أشيلو معاي
ولا زولاً... مع اترفَّق
ولما خلاص بقيت ماااارق..
نجيم الليل مشى اتفرق
بيكت.. وبكيت..
طريف العين متمسح بالدموع رقرق
عشان مظلوم...
زماني الليلي شتَّت.. للشمل فرَّق
بسوي الووب..
نحاس أحزاني
جوة قليبي... ينقر.. دق..
يوهدبني..
يلوِّعني..
واخاف من المصير واشفق
اوادع الناس..
وافوت مجبور..
يجيني نغيم..
من الطنبور..
اشوفلِي جِنّيْ.. وقف صفَّق
ينُط لا فوق...
يطير يندَق.. واطير واندَق
وادنقِر فوق تراب بلدي...
أخُم بي إيدي في رحلي..
أقول يا ليل وافارق الدار...
أجر فوق الوداع مسدار...
أنوني .. أنوني...
شاق الواح..
محال ارتاح..
أدخِّل إيدي في رحلي...
تُراباً فيهو تسوَى الكون..
تراب بلدي...
أشيل منُّو..
أشم وارتاح..
أشم طيبةَ أهلي..
مِنُّو تفوح.. ترد الروح
عيوناتُن تلوح.. وتلوح
عراريقُن.. طواقيهُن..
طواريهُن.. سواقيهُن..
أنين الساقي لما تنوح..
حسيس البربَخ المفتوح..
...........................
واعاين يا تراب بلدي...
أشوف فيك صورة ماب تنشاف
واشم ريحة الكُليت والشاف
بنات بلدي.. بنات بلدي...
طريحاتِن.. مناديلِن...
رقيصاتِن.. شبابيلِن...
حليلي.. حليلي... يحليلِن..
............................
واشيل من زادي واتكرَّف
واشوف فيك...
يا تراب بلدي الحنين المابي يتوصَّف
سماح ناساً
حلاة ناساً بلا السُكَّر..
طعم قراصة..
في قدحاً من الدَّبْكَر
كواريك شُفَّع المغرب
يقَلِّبوا في الجَّمر قنقَر..
ولاد بلدي.. ولاد بلدي...
نقاقيرُن.. طنابيرُن...
جبابيدُن... سنانيرُن...
...........................
وافوت يا ناسي في دربي
أقول يا أهلي واااغُلبي.
خلاص ريدكُن ملك قلبي
منو الغيرْكُن بشيل حبي...





  رد مع اقتباس
قديم 09-17-2010, 05:43 AM   #20
ابونفيسه

عضو ذهبي
افتراضي

من اشعار حاتم حسن الدابى

لسان الحال


معذرة.. لو معاك منى الكلام حـــــره
معليش الخطاب كاتباهــــــو مضطرة
حـــــــــــرام والله مننـــا إنت تتبرا
خمسة سنين تفوت تجى فيها فد مرة
وراك أنا كم شقيت وعشت فى مرة
وتعبـــت مع البطان الهم للعيون غرة
بيخاف الغرق الغاص ورا درة
قالو أدب الصغار والعقــــدة من خدرة
حليلى أنا الزمن ضى فاطرى ما انفر
وخمسة سنين غياب مابتحملن حرة
أنا الحاضنة العذاب وآمالى محتضرة
وإنت الفى النعيم ما خات حساب بكرة
مسكينة التقول فى الإغتراب سترة
وتتناسى القروش فى يوم تكون ضرة
حليل زمنك وكت عايشنا بالأُجــرة
يا ريــــت لا عرفـــــــت ولا مرق برة

الكاتما فى جواى كتير متملك الجوف والعصـب
وما كت دايرة أقولو ليـك لكن لسان الحال غلـب

ما بنسى يـوم ودعتـنا وسافـرت فى غـرة رجـب
خلـيت وراك الـدار حـزين يتباكـا والدمع انسكـب

أعذرنى والله العظيـم لو ما الضـرورة أنا ما كـتب
وأنا خايفـة فى بعـدك يكون الضاع
هو ضعف المكتسـب

اليومـة داك ناس البلـد هنونى شايقيـى وعرب
قالو لى مبروك خير وجاك يكتب سلامـتو الإغــترب

قالو لى دوب نجم السعد
طلاكى من بعــد إحتجــب
يا دوبا بالك يستريح
وتنسى العــذابات والتعــب

فضّلت أحسب فى الشهور
قاعدالى فوق نيران لهــب
صابرة وحريصة على العيال
لا بيقو للريح فى المهـب

سديت خانتك مــن مشيت قايمـابو واجبـى كأم وأب
والأسـرة يضنيها المسير
وتتهاوى لو ما فيها رب

والله ما بنـكر جميلك برضـو لينا ثناك وجب
موكب هداياك ما انقطع
كان سترة فى الزمـن الصعب

لابسين وماكلين والنعيم كايلنا
فى يوم ما نضب وعايشين معيشـة المترفين
طولنا والطبع إتخرب

البيت مفرش بالحرير ومليانة إيدى بالدهب
لكن خسارة على محل
عاش سيدو خمسة سنين عزب

الشى المهم ما قلتو ليك
وليهو إنت ما ظنيت
حسب كبرو الصغيرونين خلاص
خايفالم الطبـع الكعب

وصولوها مرحلة الخطر
والأمن ما زال مستتب
وانا كتّ قادراهم زمان
لكـن بعد كبـرو اتغلب

حصلنى قبل الجد يفوت
دوبنهم فوق العتب
قبال نحصـد الخير ندم
ومابيجدى كان لمت وعتب

خايفالم الطيش فى الدروس
ومابرضى لو واحد رسب
خوفنى المتعبنى الكبيــر
بعدين يمرقو بلا أدب

وريتك الحاصل على
لا فيهو ثورة ولا غضب
شان الحديث مايبقى نى
والواحـة يكتنفا الجدب

أنا قلبى مازال لسة حى
ونجمو الملاهج ماغرب
وآخر كلامى ترد على
لا أبقة بكــرة أنا السبب
ما كنت دايــرة اقولو ليك
لكن لسان الحال غلب ..





  رد مع اقتباس
قديم 09-17-2010, 05:47 AM   #21
ابونفيسه

عضو ذهبي
افتراضي

يا قمره ... صبي السنسني الحمـره
شوفي أبوي أنا الراجاهو كلو صبـاح
يا زينوبه أبوكي هو أصلو حالو بـره
لو قاري العلم هو ولاهو سيد خبـره
ومو زول غربه لكن الظروف جابره
مالو إن كان صبر كل الخلوق صابره
والصابرات روابح لـو يجـن قمـاح

هو أصلو متين نساكم يُمة شان يطره
بيتنفـس هـوا ذكراكـم العـطـره
رهيف إحساس حنين قلبـو بالفطـره
نديمو بقت دموعو الديمـه منقطـره
وأصلو إن ما قعد بينكـم ولا بيرتـاح

جاهو العيد كمان زاد القليب حسـره
ساد العبره حلقـو ونفسـو منكسـره
هو لا لمّ القروش لا حصل المسـره
بلد ما فيها زول مات من عدم كسـره
فراقكم ليها يا أحباب ولا كان صـاح

يـا أمارتـي المـا طاعـت الأمـره
ندماني وبقـت محتـاره فـي أمـره
بعد قسن الـدرادر قصـرن عمـره
الشوق فاض وعماها الحنيـن غمـره
الشوق للبلـد لـي بهجتـه وسمـره
الشوق لي مقيلا ضـم ضـم تمـره
الشوق لي حديثا ضـم ضـو قمـره
الشـوق للبلـد جابريـتـا وكـكـره
كان الشوق يخفف والله يبرى جـراح

مشتـاق للحسينـاب أسقـه وبكـره
مشتاق للقبيل إتربـوا فـوق حكـره
مشتـاق للدميـري ومويتـه العكـره
مشتاق للجزيـري وتشقـه وهكـره
مشتاق لي قطع بحره ودخول وكـره
مشتاق للأبي يفـارق الفـؤاد ذكـره
مشتاق للعلـى مشغـول دوام فكـره
مشتاق للصباح ديـدن غنـاي شكـره
وياريت كت بقدر أسوي شوقي جناح.





  رد مع اقتباس
قديم 09-17-2010, 05:49 AM   #22
ابونفيسه

عضو ذهبي
افتراضي

صديق احمد
عبدالله محمد خير





نسيتك أنا نسيتك مـا لأنـي إنسـان ونسـاي
نسيتك أنا لأني بقيـت لمـا أطـراك بساهـر
وإنــت طـيـفـك مـاهــو لـــولاي
نسيتك أنا عشان ردة فعـل ذكـراك جـواي
بقـت تنـتـر مـغـس مــرات ولــواي
نــســيــتـــك أنــــــــــا
ونسيت كل السماحه الفوق دريبا بقيت غنـاي
وخليت لك بلد بي حالو ورحلت بـي جـاي
غلطانه إن بقيت فهمتي إنو رحيلي فـوق رأي
مهاجر شان أحسن حالي وأرجع ليك شاشاي
وحاتك لا لا .. دنياك ما بتوافق تاني دنيـاي
وحاتك لا لا .. لا داير أخادعك ولاني خازاي
قـسـا الـقـلـب البـبـكـي الـشــوق
عـلـيـك بـقــي مـاهــو بــكــاي
وجـفـاهـا الـقـمــري عصـريـاتـنـا
مــاعــاد فـيـهــا .. قــوقـــاي
صحيح حسدوني فيك زمن عزلتك وقالوا نقاي
ما عارفني بكدح وبشقى ساكت وماني لقـاي
يفيض بحرك يعم وما فيهو من تالاي سقـاي
نسيتك أنا وبفتش في دليل لي دربي ضـواي
دحين أطفيها نار الغيـره أو زيديهـا بوبـاي
وأبكي على غرورك بعدي أو كوسيلو رضاي
وقول لي معاك سلامـه، أو قوليهـا بابـاي





  رد مع اقتباس
قديم 09-17-2010, 05:54 AM   #23
ابونفيسه

عضو ذهبي
افتراضي

بجيك قاطع مسافات العشم ... ( عبدالرحيم ارقى )

باكر بجيك قاطع مسافات العشم
شايل معاي هوى العيون
آمالي في أجمل نغم
باكر بجيك قاطع مسافات العشم

بجيك من سكـــة القلب العشق ذاتك سنين
بجيك من صفحة الماضي الكان قاسي وضنين
خايف يكون زيف المدن غير أصالتك والحنين
جايك من ليل العـذاب ارجيني بالصبح المبين

فُتيني للليل الطــويل يرميني في حضن الآلم
سبتيني بين شبح الظنون وأحزان بتنبع من وهم
ارجيني فوق أرض الصبر جايك من زمناً سجم
لا فيهو للأفــراح طريق ولا فيهو للأيام طعم

باكر بجيك بي لعنة الريد المـــــلك قلبي الجريح
بي حال بيغني عن السؤال ما بوصفو الخاطر الفصيح
خايف يقصر بي العمــــر تحملني من الدنيا ريح
لو كان مُقدر إني اروح سوي لي في روحك ضريح


سافرتي مـــا خليتي خيط ابراه للمرسى الجديد
سافرتي مـــا خليتي لي غير ذكرة الزمن البعيد
علمتي روحي الإنشراح علمتي قلبي يحــب شديد
فجاءة اختفيتي من الدروب وأخفيتي كل زمني السعيد


لكني لي أحســـاس يسوق خطواتي لأجمل عيون
باكر بتلقي خطاي معــاك تتمشى ما بين الغصون
ما تقولي لي وصلت كيف مــن دل قلبك يا حنون
أنا قلبي أصبح ليك مكان يا الناسية إني انا ليك كون

باكر بنكشف الضباب القـــاك في فرح الشباب
تقشي في دمع الفـــراق وتزيلي في أثر العذاب
بكرة المسافـات تجتمع وتلم قلوب يوم عيدها آب
ويعود شباب الفي هواك يا حلوة بي أحزانو شاب





  رد مع اقتباس
قديم 09-17-2010, 05:56 AM   #24
ابونفيسه

عضو ذهبي
افتراضي


إبتسامه
جعفر السقيد


ضاري الهموم بي طرحتك لا تفضحى السـر الدفيـن
لو تجدي دمعات العيـون كانـت بقـت فتحـاً مبيـن
لى ناس بتستلف الصبر من بكره شان تحيابـو ديـن
تترجى زمن ما بيجي راجياهـو أجيـال مـن متيـن
أبقي زي مـا قلتـا مبتسمـه فـى الزمـن الحزيـن
مغسولة بي نور القمر ولابسه العفاف في كـل حيـن
ما عندي ليك غير الهوي وطنبـور موتـر بالحنيـن
اطفيبـو نيـران الجـوى واكتبـوا اغانـي المتعبيـن
كان يحلم البايت القوى بالعيشـة مـا بيـن مترفيـن
يوماتي بحلم زى طفـل وابنـي الرواكيـب والبيـوت
الوقت فوق ساقية قصب واشتلـك احـلام دار تمـوت
من غير ظنون وبلا شروط نسكن بيـوت العنكبـوت
واحلامنـا نديهـا البحـر تتخاتفـا الموجـه وتفـوت
يوم قلتا اسـرح بـي وراك تاقيتـي بـاب الموبقـات
قلتـي إنـك مؤمنـه وممتسـلا بـأمـر الصـفـات
كل المصائب والمحن فاتحـالا صـدرك مـن ثبـات
ما تكلميني عن الهوي وعـن قصـة الحـب البضيـع
مابين مشاوير الحياة وسنـدان زمـن قاسـى وفظيـع
رغم إنو درسنى الصبر خرجنى لافـى بـلا وجيـع
رضيان من العالـم وراى ركبـت قطـارات النجيـع
نمـرق يواكبنـا الـرزق لكنهـا الارزاق نصـيـب
نرجع نخاف شبح الظلام والوحشـة والليـل الرهيـب
نتلاقي تضحكى من بعيد وفى الكتمه ضحكك همبريـب
وعفواً حبيبتي كما الطيور عايشين كفاف زمناً عصيب.





  رد مع اقتباس
قديم 09-17-2010, 06:00 AM   #25
ابونفيسه

عضو ذهبي
افتراضي

لا شوفة تبل الشوق ولا ردا يطمّن
أريتك تبقى طيب إنت ، أنا البي كلو هين
قليبا لي رهيّف عارفو ماب يحمل حنيّن
إنت ماب يغباك حالو الفيهو كل البيهو بيّن
بقيت مالي غير أشعاري أكتبه فيك وأدوّن
أقول يمكن تزيل ما بي ولاّ قليل تهوّن
ومالكن يا قماري بتشدن إيش لازمة تغنّن
نغيماتكن تهيج أشواقي للعينين يبكّن
بدّيكن وصية أمانة لي سيد روحي طيرن
ترا الحال العي شفتنو قولن ليهو أحكن
قوليلو السحب في روضو ما عادن يكبّن
وأضحى محل خراب ما فيهو غير زهرا مضبلن
قولن ليهو ليلو طويل .. طويل.. طولا يجنّن
لا قمرا ظهر في سماهو ، لا نجمات يضوّن
وكل ماليهو يتصبّر يقول أيام يعدن
يمنّي لنفسو بي لقياك ولاّ ترد لو يمكن
اربعة :





  رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
خصلتان من كانتا فيه كتبه الله شاكراً صابراً sadigeen المنتدى الإسلامي 2 07-31-2010 07:27 AM
توضيح للبوست الذي كتبه العضو الزنجي عن اسعاف مستشفي البرقيق العمدة المنتدى العام 19 08-04-2009 05:02 PM
قالوا عن الزواج‏ صريح ضد الريح الأخبار والمواضيع المتنوعة 0 05-08-2009 05:12 PM
الحب قبل الزواج‏ صريح ضد الريح المنتدى العام 5 03-02-2009 07:58 AM
براءة المنهج السلفي مما كتبه الأخ علاء الدين مسامح المنتدى الإسلامي 8 10-03-2008 09:53 AM


شات تعب قلبي تعب قلبي شات الرياض شات بنات الرياض شات الغلا الغلا شات الود شات خليجي شات الشله الشله شات حفر الباطن حفر الباطن شات الامارات سعودي انحراف شات دردشة دردشة الرياض شات الخليج سعودي انحراف180 مسوق شات صوتي شات عرب توك دردشة عرب توك عرب توك


الساعة الآن 01:47 AM.


Powered by vBulletin® Version 3.8.7, Copyright ©2000 - 2014, Jelsoft Enterprises Ltd. TranZ By Almuhajir
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل الرأي الرسمي لأصحاب الموقع أو منتديات رمال كرمة (قسكو تيق) بل تمثل وجهة نظر كاتبها .